12 foiz keshbekka ega bo‘ladi…

Davlatimiz tomonidan ijtimoiy himoyaga muhtojlarga alohida e’tibor qilinadi. “Soliq” mobil ilovasi orqali ijtimoiy keshbek olish huquqi berilgani ham ana shunday e’tiborning bir ko‘rinishi deyish mumkin. Demak, ijtimoiy keshbek olish uchun “Ijtimoiy himoya yagona reyestri”ga kiritilgan jismoniy shaxslar chakana savdo obyektlaridan ayrim tovarlarni sotib olganda xarid summasidan 1 foiz miqdordagi keshbek oʻrniga, 12 foiz QQS summasini qaytarib olishlari mumkin.
Faqat barcha tovarlardan emas, balki qo‘y, mol va parranda go‘shti, tuxum, o‘simlik yog‘i, un, shaker, dori vositalari hamda tibbiy xizmatlar QQS qaytariladigan mahsulotlar ro‘yxatiga kiritilgan.
QQS summasini qaytarish uchun “Ijtimoiy himoya yagona reyestri”ga kiritilgan iste’molchi Soliq ilovasini yuklab olib, ro‘yxatdan o‘tadi va xarid chekining QR-kodini skanerlaydi. “Ijtimoiy keshbek”ni “Keshbek va imtiyozlar” bo‘limida kuzatib borish mumkin.
QQS qaytarishda xarid qilingan tovar QQS qaytariladigan mahsulotlar ro‘yxatiga kiritilganligi, xaridor “Ijtimoiy himoya yagona reyestri”ga kiritilganligi hamda tadbirkor QQS to‘lovchisi sifatida ro‘yxatdan o‘tganligi hisobga olinadi. QQS summasini chek roʻyxatdan oʻtkazilgan oydan keyin oyning 25-sanasidan so‘ng Soliq mobil ilovasi orqali qaytarib olish mumkin.