“Boysun bahori”ning bayram tomoshalari asosiy sahnada jamoalarning chiqishlari bilan davom etayotgan bo‘lsa, shuningdek, har bir tuman folklor jamoalari uchun alohida joylar ajratilgan.
Ular odatdagidek faqatgina o‘tov tikib, milliy liboslarini namoyish etib qolmasdan, bu yilgi festivalda alohida qo‘rg‘onchalarda hududidan yetishib chiqqan allomalar, qahramonlar hayoti va faoliyatini aks ettirgan va o‘sha davr qiyofasini gavdalantirgan sahna ko‘rinishlari bilan ham mahalliy va xorijiy sayohatchilarga milliy qadriyatlarimizni yana bir bor ko‘z-ko‘z etishmoqda.
Oltinsoy tumani qo‘rg‘onida ham bo‘ldik.
O‘tov atrofida namoyishga qo‘yilgan milliy hunarmandchilik buyumlaridan tortib, tumanda ishlab chiqarilayotgan mahsulotlar ham festival ishtirokchilariga namoyish etilmoqda.
Qo‘rg‘on to‘rida esa tuman o‘lkashunoslik muzeyi o‘z tarixidan so‘z ochib turibdi. Ushbu muzeyda 3 mingga yaqin qadimiy osori-atiqalar saqlanmoqda. Muzeydan joy olgan eng qadimiy buyumlardan biri sifatida bundan qariyb 2700 yil ilgari yaratilgan buyumni, non saqlashga xizmat qilgan qadimgi davr non idishlarini muzey rahbari alohida e’tirof etdi.
Har bir qo‘rg‘on va o‘tovlar o‘ziga xos yasatilganki, unga kirgan kishi borki, qadimgi davrga sayohatga chiqqandek ulkan taassurot oladi. Ayniqsa, chet elliklarda milliy urf-odat va an’analarimiz o‘zgacha bir kayfiyat uyg‘otmoqda.
A.Safarova
