Ko‘p bilan ko‘prik muammosi hal

Jarqo‘rg‘on tumanidagi “Qorayog‘och” mahallasida ezgu an’anaga aylangan hashar tadbiri bo‘lib o‘tdi. Mahalla ahli o‘zaro hamjihatlikda ko‘prikni kapital ta’mirlash ishlarini amalga oshirdi.
Ko‘prik mahalladagi asosiy yo‘llardan biri bo‘lib, yillar davomida eskirgan va foydalanish uchun xavfli holatga kelgan edi. Fuqarolar o‘z tashabbuslari bilan mablag‘ yig‘ib, ta’mirlash ishlarini boshlashdi.
Hashar davomida ko‘prikning asosiy konstruksiyasi mustahkamlandi, yangi beton qoplama yotqizildi va xavfsizlik choralariga e’tibor qaratildi. Ezgu ishda faol qatnashib, birgalikda mehnat qilish orqali jamoaviy birdamlikning yorqin namunalarini ko‘rsatishdi.
Natijada, nafaqat mahalla aholisi, balki yaqin-atrofdagi yurtdoshlar uchun ham qulay va xavfsiz yo‘l yaratildi. Ushbu hashar mahalla fuqarolarining o‘z hududiga mehr bilan qarashlari, hamjihatlikda ishlashlari va jamiyat taraqqiyotiga o‘z hissalarini qo‘shishga tayyor ekanliklarini yana bir bor namoyon etdi.