Mehmonxona biznesi ham vohada yaxshigina rivoj topmoqda. Chekka-chekka hududlarda milliy qadriyatlarimiz ruhida zeb berilgan mehmon uylari xizmat ko‘rsatayotgan bo‘lsa, mahobatli binolarning qad ko‘tarib osmonlarga tenglashayotgan, talab va xizmat ko‘rsatishda esa xalqaro mezonlar bilan yuzlashayotgan mehmonxonalardagi shart-sharoit bilan tanishib, ularning “yulduz”lariga baho berasiz. Milliy taomlarimiz va shifo bo‘lguvchi tabiatimiz esa o‘zi bir mavzu…
To‘g‘ri-da, tashrif buyurajak mehmonning taassurotlarini ular qo‘nim topgan mehmonxonadagi sharoit-u xizmatlar belgilab beradi. Aks holda yashayotgan joyidan ko‘ngli to‘lmagan sayyohning sayr-u sayohatga oyog‘i tortarmidi. Janub gavharining markazida ana shunday xalqaro standartlarga uygʼun shakldagi yangi mehmonxona – “GOLD PALACE” foydalanishga topshirildi.
Tadbirkor Zohid Mallayev o‘z g‘oyasi ila bo‘y-bastini ko‘rsatgan mehmonxonani jihozlash va bezash ishlarida ham bosh-qosh bo‘ldi. 24 xonadan iborat mehmonxonada konferens-zal, avtoturargoh, sport maydonchasi ham mavjud. Dam olishni ko‘ngliga tukkan mehmon borki, stol tennis va billiard o‘yinlaridan bo‘shay olsa, boshqa rejalarga o‘tishi mumkin. Barcha qulayliklar ko‘ngilli hordiq chiqarishga yordam beradi.
S.Normurodova
