Ilmga bag‘ishlangan hayot yo‘li yuksak ibrat namunasidir. Inson ilm bilan kamolotga erishib, hayot haqiqatlarini anglaydi. Bu uning botinida namoyon bo‘la boshlaydi. Jamiyat hayotimizda, atrofimizda hayotini ilmga bag‘ishlagan insonlar, olimlarning borligi tanlagan yo‘limizga nisbatan ishonchimizni oshiradi. Termiz davlat universiteti o‘zbek filologiyasi fakultetida faoliyat yuritib kelayotgan ustoz Normat Yo‘ldoshev ham ana shunday yo‘ldan mardonavor yurib, xalq orasida hurmat va e’tibor qozongan inson. Uning ilm va hayot yo‘liga bag‘ishlangan adabiy-badiiy kecha esa barchaga katta qiziqish uyg‘otdi.
Tadbirda so‘z olganlar ustozning bugungi kundagi yutuqlari va erishgan natijalarini alohida e’tirof etishdi. Ilmiy izlanishlari haqida to‘xtalib, ustozning tanlagan mavzularining ilmiy ahamiyati, nechog‘lik dolzarbligi haqida to‘xtalishdi. Albatta, ustoz muallifligidagi qator maqolalar, risola va darsliklar o‘z-o‘zidan yozilib qolgan emas. Unda muallifning mehnati, izlanishlari mujassam. Shu jihatdan, kecha qahramonining faoliyatiga qiziqish bildirgan yoshlar, ustozga o‘zlarini qiziqtirgan savollarini berib, munosib javob ham olishdi.
Samimiy ruhda o‘tgan kechada ustoz shogirdlarining e’zozi va ardog‘ida bo‘ldi.
