“Lochin” birinchi

“Ko‘pkurash” sport musobaqalari sportchini tezkorlikka, chaqqonlikka, ilg‘orlikka chorlaydi. Musobaqaning Jarqo‘rg‘on tuman bosqichida ham ishtirokchilardan ayni shu jihatlar talab etildi. Unda Jarqo‘rg‘on tumanida joylashgan professional ta’lim muassasalari o‘quvchilaridan iborat jamoalar ishtirok etib, tezkor savol-javoblarda bilimlarini sinovdan o‘tkazishgan bo‘lishsa, keyingi shartda “AKM” avtomatini qismlarga ajratib, so‘ng yig‘ib ko‘rsatdilar.
Navbatdagi shartlarda esa yoshlar turnik tortinishdi, estafeta yugurish hamda pnevmatik quroldan o‘q otish bo‘yicha bellashishdi. Musobaqa murosasiz kechdi. Jamoalar g‘oliblik uchun bellashdilar va bor kuch hamda mahoratlarini ishga soldilar. Yakuniy natijalariga ko‘ra Ichki ishlar vazirligi Surxondaryo Akademik litseyining “Lochin” jamoasi g‘oliblikni qo‘lga kiritdi. G‘olib jamoalar qimmatbaho sovg‘alar bilan taqdirlandi.