Ro‘za tutmoqlikning farzi, savobi haqida ma’lumotlarga egamiz. Aslida ro‘za tutish nafaqat ruhiyatimizni, balki organizmimizni ham poklaydi. Ortiqcha vazndan xalos bo‘lish, qon bosimi va organizmdagi xolesterin miqdorini pasaytirishga yordam beradi.
Ro‘zadorlar uchun tavsiya etiladigan fikrlar esa foydadan holi bo‘lmaydi, albatta. Eng avvalo, kun davomida yo‘qotilgan suyuqlik o‘rnini qoplash ehtiyoji yuzaga keladi. Buning uchun esa kamida 10 stakan suv ichish tavsiya etiladi. Sersuv mahsulotlar tanovul qilish orqali ham bu me’yorni qisman qoplash mumkin. Masalan, saharlik paytida yoki iftorlikdan keyin dessert sifatida ho‘l mevalardan yeyish foydali. “Achiq-chuchuk” salati tarkibidagi bodring va pomidor ham sersuv ne’matlar hisoblanadi. Sho‘rva yoki sabzavotli salatlar singari suvga boy taomlarni ham iste’mol qilish mumkin.
Tarkibida kofein mavjud bo‘lgan kofe, choy, gazli ichimliklardan voz kechgan ma’qul. Chunki bu modda inson organizmida suv miqdori kamayishi (degidrasiya)ga olib keladi.
Kun davomida juda ko‘p harakat qilish organizmning ko‘p miqdorda suv yo‘qotishiga olib keladi. Qisqa muddatli sayr yoki chigalyozdi mashqlari sizni tonusda ushlab turishi mumkin. Ammo, kun bo‘yi harakatsiz o‘tirish ham tavsiya qilinmaydi.
Surxontongi.uz
