Oltinsoy tumanidagi 45-maktab o‘quvchilari yangi o‘quv yilining boshlanganidan bir quvongan bo‘lsa, yap-yangi, barcha shart-sharoitlarga ega binoda, shinam sinfxonalarda o‘qishni boshlashlari ikki karra shod etdi.
Erta tongdan ko‘tarinki kayfiyatda “Yangi O‘zbekistonda el aziz, inson aziz” shiori ostida boshlangan bayram tadbirida iqtidorli o‘quvchilar o‘z san’ati va mahoratini namoyon etdi.
Tuman hokim A.Jumayev ham maktabning ochilish marosimiga ishtirok etib, o‘quvchi-yoshlarning quvonchiga sherik bo‘ldi.
Ayniqsa, birinchi sinfga qabul qilingan bolajonlarning hayajoni cheksiz. Ular sinfxona ostonasidan ichkariga xatlashar ekan, ustozlari yorug‘ yuz bilan qarshi oldi. Tuman hokimi va nuroniy otaxonlarning duolari bilan o‘g‘il-qizlarning har biriga 12 turdagi o‘quv qurollari, maktab sumkasi, darsliklar majmuasidan iborat Prezident sovg‘alari topshirildi.
S.Normurodova
