Surxondaryoning issiq iqlimi qishloq xo‘jaligida yangi yo‘nalishlarni rivojlantirish uchun keng imkoniyat yaratmoqda. Sho‘rchi tumanida esa issiqxona sharoitida banan yetishtirish bo‘yicha amaliy tajriba ommalashtirilmoqda. Obodon mahallasidagi bananchilikka ixtisoslashtirilgan issiqxonada tuman hokimligi, qishloq xo‘jaligi bo‘limi, Agroximatlar markazi va Bog‘dorchilik agentligi hamkorligida amaliy seminar tashkil etildi.
Unda banan yetishtirishning zamonaviy agrotexnologiyasi — nav va ko‘chat tanlashdan tortib, ekish, parvarishlash, o‘g‘itlash, kasallik va zararkunandalarga qarshi kurashish, hosilni yig‘ish hamda saqlashgacha bo‘lgan jarayonlar yuzasidan mutaxassislar tavsiyalari berildi.
Seminar ishtirokchilariga “Surxondaryo viloyati issiqxonalarida banan yetishtirish texnologiyasi” bo‘yicha ilmiy-amaliy tavsiyanomalar ham tarqatildi. Bunday amaliy seminarlar ilmiy yondashuv va ilg‘or tajribani ishlab chiqarish bilan uyg‘unlashtirib, issiqxona xo‘jaliklarida yangi, daromadli yo‘nalishlarni rivojlantirishga xizmat qilmoqda.
