Bandixon tumanida dalalar oq oltin hosiliga to‘lib, mas’uliyatli paxta yig‘im-terim mavsumi boshlandi. Paxtakor hududidagi “Omad” fermer xo‘jaligining 25 gektarlik dalasida mavsumning ilk terim jarayoniga start berildi.
Terimni mahallaning mehnatkash xotin-qizlari boshlab berib, mo‘l hosilni nes-nobud qilmay yig‘ib olishga bel bog‘lashdi. Dalada terimchilar uchun zarur sharoitlar yaratilgan.
Joriy yilda Bandixon tumanida 3 ming gektar maydonda paxta yetishtirildi. Hosilni qisqa muddatda va sifatli yig‘ib olish maqsadida 43 ta terim otryadi shakllantirilib, mavsumga 5 ming nafardan ortiq terimchini jalb etish rejalashtirilgan.
Paxta yig‘im-terimi — qishloq mehnatkashlarining bir yillik zahmatiga yakun yasaydigan mas’uliyatli jarayon. Har bir terilgan paxta ortida halol mehnat, oila farovonligi va yurtimiz dasturxoniga baraka mujassam.
