Yoshlarning qiziqishi va iqtidorini aniqlash, tashabbuslarini qo‘llab-quvvatlash hamda zamonaviy kasblarga yo‘naltirishda maktab maslahatchilarining o‘rni muhim. Shu maqsadda Termiz davlat pedagogika institutida Maktab maslahatchilarining viloyat forumi tashkil etildi.
Unda hududiy “Kelajak” markazlari rahbarlari, tegishli bo‘lim boshliqlari hamda tumanlardan 250 nafarga yaqin maktab maslahatchilari ishtirok etdi.
Forum doirasida seminar, amaliy mashg‘ulot va mahorat darslari o‘tkazilib, o‘quvchilar qobiliyatini aniqlash, ularni to‘garak, tanlov va loyihalarga jalb etish, shuningdek, kasbga yo‘naltirishning samarali usullari muhokama qilindi.
O‘quvchilarning sport, san’at, xorijiy tillar, IT, dasturlash, robototexnika va sun’iy intellektga qiziqishini qo‘llab-quvvatlash masalalariga ham alohida e’tibor qaratildi.
Ochiq muloqotda maktab maslahatchilari o‘z taklif va tashabbuslarini bildirdi. Yangi o‘quv yilidan viloyatdagi 978 ta maktabda ushbu faoliyatni yanada samarali tashkil etish, ilg‘or tajribalarni ommalashtirish va maktab — maslahatchi — “Kelajak” markazi hamkorligini kuchaytirish bo‘yicha vazifalar belgilandi.
Maktab maslahatchisi — o‘quvchining qiziqishi va iqtidorini yuzaga chiqarib, uni kelajak sari yo‘naltiruvchi muhim ko‘prikdir.
