Endilikda 10-sinf o‘quvchilari ham o‘qishini texnikumlarga ko‘chirish imkoniyatiga ega bo‘ladi. Bu boradagi yangi tartib Vazirlar Mahkamasining 450-son qarori bilan tasdiqlandi.
Qarorga muvofiq, kasbiy ta’lim tashkilotlari o‘quvchilarining o‘qishini ko‘chirish yoki qayta tiklash, shuningdek, umumiy o‘rta ta’lim muassasalarining 10-sinf o‘quvchilarini texnikumlarga ko‘chirish bo‘yicha davlat xizmatlarining yagona tartibi joriy etiladi.
Arizalar Davlat xizmatlari markazlari yoki Yagona interaktiv davlat xizmatlari portali orqali elektron shaklda topshiriladi. Yangi tartib yoshlarning kasbiy ta’lim olish imkoniyatlarini kengaytirish, xizmatlarni raqamlashtirish va ortiqcha byurokratik jarayonlarni qisqartirishga xizmat qiladi.
Bu esa 10-sinf o‘quvchilariga o‘zlari tanlagan kasb bo‘yicha ta’limni ertaroq boshlash uchun yangi imkoniyat yaratadi.
