Mehr-oqibat va insonparvarlik qadriyatlarini keng targ‘ib etish, ehtiyojmand oilalar va ijtimoiy ko‘makka muhtoj fuqarolarni qo‘llab-quvvatlashga qaratilgan ezgu tashabbuslar joylarda izchil davom etmoqda. Surxondaryo viloyati hokimi tashabbusi bilan “Yagona Vatan, yagona xalq bo‘lib, yangi hayot va kelajak yaratamiz!” shiori ostida boshlangan ezgulik chellenji Uzun tumanida ham davom etdi.
Tuman hokimi Xabibulla Bozorov boshchiligida mahallalarda istiqomat qiluvchi 127 nafar boquvchisini yo‘qotgan fuqaro hamda o‘zgalar parvarishiga muhtoj 32 nafar yolg‘iz keksa uchun zarur oziq-ovqat mahsulotlari jamlanmalari topshirildi. Shuningdek, 28 nafar ehtiyojmand oilalar farzandlarining kontrakt to‘lovlarini qoplash uchun vaucherlar berildi.
Mustaqillik bayrami arafasida ko‘rsatilayotgan bunday e’tibor va amaliy ko‘mak ehtiyojmand oilalar hamda nuroniylarni quvontirib, ezgulik va mehr-oqibat muhitini yanada mustahkamlashga xizmat qilmoqda.
