Aholining bandligini ta’minlash, oilaviy daromadlarni oshirish va kambag‘allikni qisqartirish borasidagi amaliy ishlar Muzrabot tumanida ham izchil davom etmoqda. Davlat mustaqilligining 35 yilligi arafasida tuman hokimligida Ijtimoiy reyestrga kiritilgan kambag‘al oilalar vakillariga tadbirkorlik va daromad topish faoliyatini yo‘lga qo‘yish uchun zarur asbob-uskunalar topshirildi.
Tadbir davomida 37 nafar fuqaroga 120 million so‘mlik 37 turdagi jihozlar, jumladan, tikuv mashinalari, overloklar, kompyuter va noutbuklar, motokultivator, skuter, duxovka, payvandlash apparatlari hamda boshqa zarur uskunalar topshirildi.
Mazkur ko‘mak fuqarolarga o‘z tadbirkorligini boshlash yoki mavjud faoliyatini kengaytirish, yangi daromad manbalarini yaratish va oilaviy farovonlikni oshirish imkonini beradi.
