Xalqaro ta’lim hamkorligini kengaytirish, talabalarga xorijiy oliygohlarda tahsil olish imkoniyatlarini yaratish va zamonaviy ta’lim dasturlarini joriy etish oliy ta’lim rivojining muhim yo‘nalishlaridan biridir. Shu maqsadda Janubiy Koreyaning FORONE HR Research Institute tashkiloti Muhandislik bo‘limi rahbari, Youngsan va Inje universitetlari vakili Kong Jung Do Termiz davlat universitetiga tashrif buyurdi.
Uchrashuvda Janubiy Koreyaning ikki oliygohi hamda Termiz davlat universiteti o‘rtasida “2+2” shaklidagi qo‘shma ta’lim dasturlarini yo‘lga qo‘yish taklifi muhokama qilindi. Tomonlar ta’lim yo‘nalishlarini belgilash, zarur hujjatlarni rasmiylashtirish va hamkorlikning keyingi bosqichlari yuzasidan fikr almashdilar. Yakunda qo‘shma ta’lim dasturlarini amalga oshirish bo‘yicha tegishli hamkorlik hujjatlarini imzolashga kelishib olindi.
Mazkur hamkorlik Termiz davlat universiteti talabalarining xalqaro ta’lim imkoniyatlarini kengaytirish, xorijiy tajribani o‘quv jarayoniga tatbiq etish va universitetning xalqaro aloqalarini yanada mustahkamlashga xizmat qiladi.
