O‘zbekiston Respublikasi davlat mustaqilligining 35 yilligi arafasida yoshlar o‘rtasida sportni ommalashtirish, sog‘lom turmush tarzini targ‘ib qilish va iqtidorli sportchilarni qo‘llab-quvvatlashga qaratilgan “Besh tashabbus olimpiadasi” doirasidagi musobaqalar davom etmoqda.
Shu munosabat bilan Surxondaryo viloyatida voleybol bo‘yicha “Ichki ishlar vaziri kubogi” respublika final bosqichiga start berildi. Termiz shahridagi Kurash majmuasida musobaqaning tantanali ochilish marosimi bo‘lib o‘tdi.
Unda viloyat va sport sohasi mutasaddilari, O‘zbekiston voleybol federatsiyasi vakillari, murabbiy va hakamlar, sportchilar hamda ommaviy axborot vositalari vakillari ishtirok etdi.
22-avgustga qadar davom etadigan musobaqada mamlakatimizning barcha hududlaridan saralangan kuchli voleybol jamoalari g‘oliblik uchun bahslashmoqda. Bellashuvlarda 16–21 hamda 22–30 yosh toifalarida jami 280 nafar qiz ishtirok etmoqda.
Musobaqa yoshlar orasida voleybolni yanada ommalashtirish, sportchilarning mahoratini oshirish va iqtidorli yoshlarni munosib rag‘batlantirishga xizmat qiladi.
