Aholiga sifatli va tezkor veterinariya xizmatlarini ko‘rsatishda mutaxassislarning zarur sharoit va vositalar bilan ta’minlangani muhim ahamiyatga ega. Bu boradagi e’tibor, ayniqsa, chekka mahallalarda xizmat ko‘rsatayotgan xodimlar faoliyati samaradorligini oshiradi.
Qumqo‘rg‘on tumani Veterinariya va chorvachilikni rivojlantirish bo‘limining Beshqahramon veterinariya uchastkasida faoliyat yuritayotgan Sherali Qultayev Jarqishloq, Joziba, Gultepa, Tayfang va Mehrobod mahallalariga veterinariya xizmatlarini ko‘rsatib kelmoqda.
Avvallari u bir kunlik faoliyati davomida 35–40 kilometrgacha masofani piyoda bosib o‘tishiga to‘g‘ri kelgan. Endilikda bu muammo homiylik mablag‘lari hisobidan xarid qilingan skuter bilan hal etildi. Transport vositasi tuman hokimi Farrux Xoliqov tomonidan Sherali Qultayevga topshirildi.
Yangi transport vositasi mutaxassisning mahallalarga o‘z vaqtida yetib borishi, chorva mollarini ko‘rikdan o‘tkazishi va profilaktik tadbirlarni tezkor amalga oshirishiga xizmat qiladi.
