Kitob — millatning tarixiy xotirasi, ma’naviy tajribasi va bugungi tafakkurini avlodlarga yetkazuvchi bebaho manba. Shu ma’noda, O‘zbekiston Kasaba uyushmalari federatsiyasi raisi, senator, siyosatshunos Qudratulla Rafiqovning “Millat Shavkati” nomli kitobi taqdimoti o‘tkazildi.
Tadbirda Respublika Ma’naviyat va ma’rifat markazi Surxondaryo viloyati bo‘limi rahbari Nargiza Rahmatullayeva, olimlar, ziyolilar, ijodkorlar, jamoatchilik vakillari va kitobxonlar ishtirok etdi.
Taqdimot davomida asarning mazmun-mohiyati, unda xalqimizning tarixiy xotirasi, milliy o‘zligi, ma’naviy qadriyatlari va bugungi taraqqiyot jarayonlari o‘zaro uyg‘unlikda yoritilgani haqida fikr almashildi. Ta’kidlanganidek, bunday asarlar yosh avlodning o‘z tarixini chuqur anglashiga, milliy qadriyatlarga hurmat va Vatanga sadoqat tuyg‘ularini mustahkamlashiga xizmat qiladi. Kitobning mazmuni va undagi fikrlar atrofidagi muloqot esa ishtirokchilarda tarix, milliy o‘zlik va bugungi taraqqiyot haqida yanada teran mushohada yuritish imkonini berdi.
Taqdimot kitobxonlik madaniyatini yuksaltirish, ma’naviy-ma’rifiy muhitni boyitish va yoshlarni milliy tafakkur ruhida tarbiyalash yo‘lidagi muhim tadbirlardan biri bo‘ldi.
