Aholining ijtimoiy himoyaga muhtoj qatlamlarini har tomonlama qo‘llab-quvvatlash, ularning jamiyatga moslashuvi va munosib turmush kechirishiga ko‘maklashish davlat siyosatining ustuvor yo‘nalishlaridan biridir. Shu maqsadda boshpanasiz shaxslarni ijtimoiy himoya qilish tizimida yangi tartiblar joriy etilmoqda.
Prezident qaroriga ko‘ra, Ichki ishlar organlarining Muayyan yashash joyiga ega bo‘lmagan shaxslarni reabilitatsiya qilish markazlari endilikda Vaqtinchalik boshpana va ijtimoiy tiklanish markazlari deb nomlanadi. Shuningdek, boshpanasiz shaxslarni ushbu markazlarga sud qarori asosida joylashtirish amaliyoti bekor qilinadi.
Joriy yilning 1-sentyabridan boshlab boshpanasiz shaxslar ijtimoiy markazlarga o‘z roziligi bilan joylashtiriladi. 2026-yil 1-oktyabrdan esa ushbu markazlarga joylashtirilgan fuqarolar ishsiz deb e’tirof etilib, ularni kasb-hunarga o‘qitish uchun maxsus vaucherlar ajratiladi.
Mazkur o‘zgarishlar boshpanasiz shaxslarning ijtimoiy himoyasini kuchaytirish, ularni kasbga o‘rgatish va jamiyatga muvaffaqiyatli integratsiya qilishga xizmat qiladi.
