Raqamli texnologiyalarni davlat xizmatlariga keng joriy etish fuqarolarga qulaylik yaratish, xizmatlar sifatini oshirish va noqonuniy holatlarning oldini olishda muhim ahamiyat kasb etmoqda. Shu maqsadda soliq tizimida ham zamonaviy sun’iy intellekt imkoniyatlaridan foydalanish ko‘lami kengaytirilmoqda.
Joriy yilning sentyabr oyidan boshlab «Soliq» mobil ilovasida keshbek bilan bog‘liq shubhali operatsiyalarni aniqlashga yordam beruvchi AI yordamchi ishga tushiriladi. Yangi tizim orqali fuqarolar chek bo‘yicha keshbek olish imkoniyatini tekshirishi, sun’iy intellekt esa shubhali operatsiyalarni tezkor tahlil qilishi mumkin bo‘ladi. Biroq yakuniy qaror soliq organlari xodimlari tomonidan qabul qilinadi.
Shuningdek, fuqarolarning murojaatlariga tezkor javob berish maqsadida «AI murojaatlar» chatbotini ishga tushirish ham rejalashtirilgan.
Matbuot anjumanida ta’kidlanishicha, 1 foizlik keshbek tizimini bekor qilish bo‘yicha hozircha rasmiy qaror qabul qilinmagan. Qoraqalpog‘iston Respublikasi va Xorazm viloyatida esa yutuqli o‘yinlar tajriba tariqasida joriy etilgan.
