Muzrabot tumanida “Yangi O‘zbekiston qiyofasidagi mahalla” konsepsiyasi asosida keng ko‘lamli qurilish va obodonlashtirish ishlari jadal davom etmoqda. Loyihaning maqsadi – aholiga qulay, xavfsiz va zamonaviy yashash sharoitlarini yaratishdir.
Tumanning “Yangi diyor” mahallasida jami 30 ta ko‘p qavatli turar-joy binolari bunyod etilishi rejalashtirilgan bo‘lib, hozirda 2 ta binoda faol qurilish ishlari olib borilmoqda. Tuman hokimi Abdulla Mamatqulov ishlarni ko‘zdan kechirib, sifat va muddatlarga rioya etilishi yuzasidan aniq tavsiyalar berdi.
Shuningdek, infratuzilmani rivojlantirish bo‘yicha muhim loyihalar amalga oshirilmoqda: 2 ta zamonaviy suv inshooti quriladi, 16 km ichimlik suvi tarmoqlari tortiladi, transformator punkti barpo etiladi, 4,5 km elektr tarmoqlari yangilanadi, 16 km ichki yo‘llar asfaltlanadi, 5 km salomatlik yo‘laklari tashkil qilinadi va 210 ta tungi yoritish chiroqlari o‘rnatiladi.
Mazkur bunyodkorlik ishlari hududni zamonaviy, qulay va obod yashash maskaniga aylantirib, aholining turmush darajasini yanada oshirishga xizmat qiladi.
