Prezidentimiz “Yashil makon” umummilliy loyihasi doirasida ko‘chat ekish tadbirida ishtirok etib, Milliy dendrologiya bog‘ini barpo etishga start berdi. Tadbir mamlakatimiz bo‘ylab keng qamrovda tashkil etildi — 14 ta hudud studiyalari videoaloqa orqali ulanib, joylarda ham yashil hududlar barpo etish ishlari boshlandi.
Davlatimiz rahbarining yaqinda imzolagan farmoniga muvofiq, 2030-yilga qadar respublikada umumiy yashillik darajasini 30 foizga, jon boshiga to‘g‘ri keladigan yashil hududlar hajmini esa 10 kvadrat metrga yetkazish ustuvor vazifa etib belgilandi.
Mazkur maqsadlar doirasida hududlarda yirik ekologik loyihalar amalga oshirilmoqda. Jumladan, Surxondaryo viloyatida ham 10 ming gektar maydonda “yashil makon” barpo etish rejalashtirilgan.
Bugun Surxondaryo viloyati studiyasidan viloyat hokimi Ulug‘bek Qosimov, nuroniylar, faollar hamda mutasaddilar Angor tumanida tashkil etilayotgan “yashil belbog‘” loyihasi hududida daraxt ko‘chatlari ekdi.
“Yashil makon” loyihasi doirasida amalga oshirilayotgan bunday tashabbuslar hududlarning ekologik barqarorligini ta’minlash, aholiga qulay yashash muhitini yaratish hamda kelajak avlod uchun sog‘lom tabiiy muhitni asrashga xizmat qiladi.
