Termiz shahrida Oila va xotin-qizlar bo‘limi tashabbusi bilan 12-umumta’lim maktabida xorijda mehnat qilayotgan fuqarolar oilalarining farzandlari uchun xayriya tadbiri tashkil etildi. Mazkur tadbirga shahardagi 110 nafar bolajon taklif etildi. Tadbirdan ko‘zlangan asosiy maqsad yangi yil ta’tili kunlarida bolalarga ko‘tarinki kayfiyat ulashish, ularning qalbida Vatanga bo‘lgan mehr-muhabbatni yanada mustahkamlash hamda mazmunli va qiziqarli ko‘ngilochar dasturlar orqali quvonch ulashishdan iborat bo‘ldi.
Tadbir davomida bolalar she’rlar o‘qishdi, qo‘shiqlar kuylashdi, sahna ko‘rinishlarida faol ishtirok etishdi. Samimiy va iliq muhitda o‘tgan uchrashuv bolajonlar uchun unutilmas xotiralarga boy bo‘ldi.
Yakunda barcha ishtirokchilarga esdalik sovg‘alari topshirildi.
