Ming afsuski, oramizda dunyoni qalb ko‘zi bilan ilg‘ab yashayotganlar ham bor. Ammo ular jismoniy imkoniyati cheklangan bo‘lishi mumkin, aslo mehr va e’tibordan, g‘amxo‘rliklardan mosuvo emas. Aksincha, mana shunday sabr-matonatli, daryodil odamlar orasida o‘zni chetga olmasdan, ijtimoiy hayotda o‘z o‘rniga ega bo‘lishga, mehnati bilan jamiyatga hissa qo‘shishga intilib yashaydiganlari qancha.
Qiziriq tumanidagi “Lochin” tantanalar saroyida to‘kin dasturxon yozilib, 55 nafar qalb ko‘zlari ila dunyoni anglaguvchi insonlar jam bo‘lishdi. Ularning faqatgina ko‘zlari ojiz. Ularning har biri o‘z mehnati bilan, tuman rivojiga hissa qo‘shish ilinjida, bir kasbu-korning etagini tutgan.
Tadbir avvalida tuman mahalla va nuroniylarni qo‘llab-quvvatlash bo‘limi boshlig‘i Erkin Saparov so‘zga chiqib, yurtimizda hech kim e’tibordan chetda qolmasligini, ular doimo e’zozda ekanliklarini ta’kidlab o‘tdi.
Shundan so‘ng, tadbir ishtirokchilari go‘zal kuy-qo‘shiqlarni tinglab, miriqib dam olishdi. Ularga tuman hokimining esdalik sovg‘alari topshirildi.
O‘z navbatida tadbir ishtirokchilari ham mutasaddilarga o‘z minnatdorchiligini izhor etishdi.
A.Safarova
