Ta’limga sarmoya yo‘naltirilsa…

Termiz shahridagi Prezident maktabida ham yangi o‘quv yili katta xursandchilik bilan boshlandi. Ayniqsa, imtihondan muvaffaqiyatli o‘tib, o‘qishga qabul qilingan 5-sinf o‘quvchilarining xursandchiligi bo‘lakcha. Albatta, barcha imkoniyatlar yaratilib, sifatli ta’lim-tarbiya beriladigan, tajribali pedagoglar jalb etilgan, hamma o‘qishni orzu qiladigan Prezident maktabida o‘qish kimni ham shodlantirmaydi deysiz.
Maktab ostonasiga qadam qo‘ygan 5-sinflarni maktab ma’muriyati va ustozlar ham mamnuniyat bilan kutib oldilar va tuhfa sifatida zamonaviy noutbuklar topshirildi. Aytish kerakki, Prezident maktabida ta’lim sifatiga, o‘quvchilarning bilimlarni o‘zlashtirishiga alohida e’tibor qaratiladi. Vaqtlari ham to‘g‘ri taqsimlangan holda, dars va mashg‘ulotlar olib boriladi. Shunday ekan, o‘quvchilarning noutbuklardan to‘g‘ri foydalanishlaridan, vaqtlarini behuda sarflashidan qayg‘urmasa ham bo‘ladi. Sababi, noutbuklardan foydalanish bo‘yicha texnik talablar, dasturlar bilan ishlash, taqdimotlar tayyorlash, internet va axborot bilan ishlash madaniyati davomiy o‘rgatib boriladi.