Ikki karra Olimpiya chempioni Bahodir Jalolov professional boksdagi g‘alabali yurishini davom ettirmoqda. O‘zbekistonlik super og‘ir vazn toifasidagi bokschi Buyuk Britaniyaning London shahridagi mashhur O2 Arena majmuasida o‘tkazilgan jangda mezbon mamlakat vakili Solomon Dakresni mag‘lub etdi.
10 raundga mo‘ljallangan bellashuv to‘liq davom etdi. Yakunda hakamlarning yakdil qarori bilan Bahodir Jalolov g‘olib deb topildi.
Ushbu g‘alaba orqali hamyurtimiz professional ringdagi yutuqlari sonini 18 taga yetkazdi. E’tiborlisi, uning g‘alabalaridan 15 tasi nokaut bilan yakunlangan.
Ma’lumot uchun, Bahodir Jalolov avvalgi jangini joriy yil 9-may kuni Manchester shahrida o‘tkazib, xorvatiyalik Agron Smakichini nokautga uchratgan edi.
