Surxondaryoda bo‘lib turgan Eron Islom Respublikasining Fors viloyati hokimi Huseyn Ali Amiriy boshchiligidagi delegatsiya Termiz davlat muhandislik va agrotexnologiyalar universitetiga tashrif buyurdi.
Mehmonlar universitet rektori Rasul To‘rayev hamrohligida Surxon geologiyasi muzeyi bilan tanishib, mintaqaning tabiiy boyliklari haqida ma’lumot olishdi.
Tashrif doirasida biznes-forum o‘tkazilib, unda savdo-iqtisodiy, investitsiyaviy va turizm yo‘nalishlarida hamkorlikni kengaytirish masalalari muhokama qilindi.
Shuningdek, tomonlar ikki viloyat universitetlari o‘rtasida qo‘shma ta’lim dasturlari, akademik almashinuv va ilmiy-tadqiqot loyihalarini amalga oshirish bo‘yicha kelishuvga erishdilar.
