Bugungi kunda nazarimizda repititorga bormasdan turib, oliygohga o‘qishga kirish mumkin emasdek. Bu qonuniyat misoli ongimizga o‘rnashdi-yu, farzandarimizni maktabdan keyin majburiy tarzda repititorga qo‘yishni “moda”ga aylantirdik. To‘g‘ri, hozir aytmoqchi bo‘lganimiz bu haqida emas. Shaharda yashovchilar uchun repititor tanlash muammo emasdir, chunki u o‘quv markazining ta’lim berishidan qoniqmayapmizmi, boshqasiga borish mumkin. Ammo, tumanlarda, chekka-chekka hududlarda na o‘quv markazi va na malakali mutaxassisni topa olamiz.
Yangilik sifatida aytish mumkinki, my.gov.uz portalida o‘quv markazi ochish uchun subsidiya ajratishning navbatdagi bosqichi boshlandi. Bu bilan esa yoshlar repititor izlab, shaharga yoki tuman markazlariga uzoq masofa yo‘l bosib qatnashlariga hojat qoldirmaydi. Qishloq hududlarida xorijiy tillarni o‘rgatuvchi o‘quv markazi ochmoqchi bo‘lganlar my.gov.uz portali orqali subsidiya olish uchun ariza qoldirishlari mumkin. Talabgorlar 10-iyulga qadar «Qishloq hududlarida xorijiy tillarni o‘qitish faoliyatini tashkil etish uchun nodavlat ta’lim tashkilotlariga subsidiya ajratish” xizmatidan foydalanishlari mumkin. Bu turdagi subsidiya bino va o‘quv xonalarini zamonaviy axborot kommunikatsiya texnologiyalari, mebel, asbob-uskunalar, o‘qitishning texnik vositalari va boshqa anjomlar bilan jihozlashga, zarur darsliklar, o‘quv-metodik adabiyotlar va boshqa kutubxona-axborot resurslari hamda vositalari bilan ta’minlash, ta’lim jarayonini tashkil etishga jalb etiladigan pedagog kadrlar mehnatiga haq to‘lashga ajratiladi.
Buning uchun esa 2 yilga mo‘ljallangan biznes reja tuzish, mahsulot yetkazib berish yoki ishlarni, xizmatlarni bajarish to‘g‘risida tuzilgan xo‘jalik shartnomalari, pedagog kadrlar bilan tuzilgan mehnat shartnomalari, pedagog kadrlarning xorijiy tilni bilish darajasini tasdiqlovchi sertifikatlari, ta’lim jarayonida foydalanilayotgan bino yoki o‘quv xonalarining ijara shartnomasi talaba etiladi.
H.Kamolova
