Kitob targ‘iboti yoshlarni kitobxonlikka, mutolaaga boshlayapti. Shunchaki o‘qish bilan esa ish bitmaydi. Mazmunni uqish, anglash, muallif nima deyayotganini tushunmoq lozim. “Yosh kitobxon” ko‘rik-tanlovi esa bu yo‘lda yoshlarning bilimlarini sinovdan o‘tkazishda eng yaxshi maktab vazifasini o‘tayapti. Termiz shahrida joylashgan Yoshlar markazida “Besh tashabbus” olimpiadasi doirasida “Yosh kitobxon” tanlovning 10-14 yosh toifasida viloyat bosqichi bo‘lib o‘tdi.
Har bir ishtirokchi berilgan shartlar asosida bilimlarini, shaxsiy fikr-mulohazalarini bildirdilar. Faol yoshlar zukkolik ila ilg‘orlik qilishgan bo‘lsa, ba’zilarning bilim va xotirasi pand bergani ham haqiqat. Qizg‘in bahs-munozaralarga, fikrlar xilma-xilligiga boy o‘tgan tanlovda boysunlik Diyorbek Normurodov 1-o‘ringa munosib ko‘rildi. Muzrabot tumanidan Feruza Normamatova 2-, Termizdan Zebarniso Farmonova 3-o‘rinni egalladi.
Tanlov so‘nggida g‘oliblar Yoshlar ishlari agentligi direktori Alisher Zafarovich tomonidan jo‘natilgan sovg‘alar bilan taqdirlandi. Ishonamizki, g‘oliblar tanlovning respublika bosqichida bosh sovrin sparkavtomobili bilan qaytishadi.
S.Murodova
