Jahon chempioni bilan yuzma-yuz uchrashish, suhbatlashish har qanday havaskor va umidli yoshni ruhlantiradi. Xuddi u kabi bo‘lishni, muvaffaqiyatning sirlarini bilib oladi. O‘z oldiga aniq maqsadlar qo‘yib, shu yo‘lda izlanadi, harakat qiladi. Oltinsoy tumanidagi 6-maktabda dzyudo bo‘yicha jahon chempioni Jahongir Mamatrahimov bilan bo‘lgan uchrashuv maktab o‘quvchilari uchun taassurotlarga boy bo‘ldi.
Jahon chempioni Jahongir ham 7 sinfga qadar ayni shu maktabda tehsil olgan. Shu dargohning o‘qituvchilari ta’lim-tarbiya bergan. Bu jihatlar o‘quvchi-yoshlar uchun yanada qiziq bo‘ldi. Maktab ta’limidan keyin Termiz Olimpiya zaxiralari kollejidagi tahsil, ko‘plab musobaqalar yosh sportichini chiniqtirgan, kuchini, imkoniyatlarini to‘g‘ri sarflashga o‘rgatgan. Bugun esa u Surxon vohasining, o‘zbek xalqining g‘ururi va faxri. Yosh chempionning chempionlik yo‘lidagi harakatlari, sport olamidagi yutuq va muvaffaqiyatlari haqidagi suhbat esa barchada katta taassurot qoldirdi. Yoshlar o‘zlarini qiziqtirgan savollarni berib, ko‘ngildagidek javob oldilar.
Sohibjamol
