Yoshlar yetakchilari mahallalarda o‘z faoliyatini boshlagandan buyon ko‘rish, kuzatish mumkinki, natija oldingi faoliyatdan tubdan farq qiladi. Asosiysi, ular faqat maktab o‘quvchilari bilan cheklanibgina qolmay, mahalladagi bekorchi, uyushmagan yosh bormi, barchasi nimadir yumush yoki mashg‘ulotga safarbar etilgan. Muhimi yoshlar yetakchisi kuch va iqtidorini, mahoratini to‘g‘ri sarflay olsa, kerakli tashabbusni vaqtida ko‘rsata olsa bo‘lgani.
Yoshlar yetakchilari ham boshqa soha vakillari qatori turli seminar va o‘qishlarga, mashg‘ulotlarga qatnashib, bilim va tajribasini oshirsa, foydadan holi bo‘lmaydi. “Yuksalish” umummilliy harakati Surxondaryo viloyati bo‘linmasi tashabbusi bilan mahallalarda faoliyat olib borayotgan yoshlar yetakchilari ishtirokida “Korrupsiya – taraqqiyot kushandasi” mavzusida tashkil etilgan seminar ana shunday ishlarning amaliy davomi bo‘ldi.
Seminarda korrupsion holatlarning kelib chiqish sabablari, davlat va jamiyat boshqaruvida uning salbiy oqibatlari, korrupsiyaning oldini olish va unga qarshi kurashish bo‘yicha amalga oshirilayotgan chora-tadbirlarning samaradorligiga erishish to‘g‘risida taqdimot qilindi.
O‘quv seminar davomida kichik guruhlarga bo‘lingan holda mavzu muhokamasi tashkil etildi. Yoshlar yetakchilarining mahallalarda korrupsiyaga oid jinoyatlarga qarshi kurashish bo‘yicha faoliyatga nisbatan munosabatini aniqlash maqsadida ijtimoiy so‘rov o‘tkazildi.
H.Baxtiyorova
