Kitoblar ilmiy va ma’naviy merosimizdir. Necha-necha asrlar avval yozilgan kitoblar, qo‘lyozmalar, adabiyotlar o‘z davrining hayotidan, kechmishidan hikoya qiladi. Adabiyotini, san’atini, xullas barcha jabhada ochib beradi. Shuning uchun ham bu merosning qiymati bebaho. Biz avlodlar esa ularni o‘qib o‘rganishimiz, anglashimiz, shonli tarixdan xabardor bo‘lib, kechagi kunimizdan, ajdodlarimizdan faxrlanishimiz lozim.
Buyuk sohibqiron Amir Temurning hayoti va faoliyati haqida o‘zbek tilida bitilgan eng eski qo‘lyozmaning aniqlangani, unga nisbatan ko‘pchilikda qiziqish uyg‘onadi.
Kitobning xotimasida qo‘lyozma hijriy 1027-yil rajab oyi sanasi qayd etilgan. Bu 1618-yilning iyun-iyul oylariga to‘g‘ri keladi. Hozircha qo‘lyozma kimning qalamiga mansub ekani, kim tomonidan va qayerda ko‘chirilgani ma’lum emas.
Dushanbedan topilgan bu noyob qo‘lyozmaning nusxasini O‘zbekistonga keltirib, taniqli tarixchi va manbashunos olimlarimiz yordamida chuqur tadqiq etish rejalashtirilgan. Reja amalga oshsa, buyuk sohibquron bobomiz haqida yangi manbaga, qimmatli ma’lumotlarga ega bo‘lamiz. Qolaversa, qo‘lyozma orqali o‘sha davrning, ijtimoiy-siyosiy hayotning yangi qirralarini kashf etsak, ajab emas.
S.Murodova
