Bugun internet axborot olish, bilim va dunyoqarashni kengaytirish uchun katta imkoniyatlar yaratmoqda. Biroq virtual makonda tarqatilayotgan barcha ma’lumotlar ham xavfsiz emas. Ayniqsa, ekstremistik g‘oyalarni targ‘ib qiluvchi materiallarni yuklab olish, saqlash yoki boshqalarga tarqatish qonuniy javobgarlikka sabab bo‘lishi mumkin.
Bunga Surxondaryo viloyatida aniqlangan holat misol bo‘la oladi. Fuqaro X.A. hamda oliygoh talabasi A.S. internet tarmoqlarida tarqatilayotgan ekstremistik mazmundagi diniy materiallarni o‘z telefonlariga yuklab olib, boshqa shaxslarga ham tarqatgan. Mazkur holat yuzasidan fuqarolar qonunchilikda belgilangan tartibda ma’muriy javobgarlikka tortildi. Sud qaroriga muvofiq, ularga jarima jazosi tayinlanib, huquqbuzarlik sodir etishda foydalanilgan smartfonlar musodara qilindi.
Bu holat internetdan foydalanuvchilar uchun muhim ogohlantirishdir. Chunki qonunga zid materiallarni tarqatish «shunchaki yubordim» yoki «oqibatini bilmagan edim» kabi vajlar bilan oqlanmaydi. Virtual makonda ham har bir harakat qonuniy baholanadi va uning uchun javobgarlik mavjud.
