Ba’zan ishlayotgan tashkilotimizdan vaqti-vaqti bilan tibbiy ko‘rikdan o‘tishimiz haqida ogohlantirishadi. Sog‘ligimizdan shikoyatimiz bo‘lmasa, bunday ko‘riklar ortiqcha dahmaza bo‘lib tuyiladi. Sog‘lik o‘zimizga kerak. Ammo, shunday bo‘lsa-da, kasallik to‘shakka mixlamaguncha, shifokor ko‘rigiga borish yetti uxlab tushimizga kirmaydi. Shuni ham unutmaslik kerakki, sog‘lom bo‘lishimiz o‘zimiz va atrofdagilarning xavfsizligi uchun ham muhim. Mehnat kodeksining Mehnat kodeksining tibbiy ko‘rik to‘g‘risidagi bandida ham huquq va majburiyatlarimiz aniq keltirib o‘tilgan.
18 yoshga to‘lmaganlar, nafaqa yoshiga yetgan xodimlar, nogironlar, noqulay tungi ishlarda, transport harakati bilan bog‘liq ishlarda band bo‘lganlar, qolaversa, oziq-ovqat sanoatida, savdo va aholiga bevosita xizmat ko‘rsatish bilan bog‘liq soha xodimlari ishga qabul qilinayotganda va keyinchalik tibbiy ko‘rikdan muntazam ravishda o‘tkazilib turishi shart.
Tibbiy ko‘rikdan o‘tish mutlaqo bepul bo‘lib, tibbiy ko‘riklarni o‘tkazish vaqtida xodim ish joyi (lavozimi) va o‘rtacha oylik ish haqi saqlanadi. O‘z navbatida hech bir xodim tibbiy ko‘rikdan o‘tishdan bo‘yin tovlashga haqli emas.
H.Baxtiyorova
