Sport infratuzilmasini rivojlantirish, yoshlar uchun qulay sharoit yaratish va nufuzli musobaqalarni yuqori saviyada o‘tkazish hududda sportni ommalashtirishning muhim omillaridan biridir. Viloyat hokimi Ulug‘bek Qosimov Termiz shahrining “Manguzar” mahallasidagi futbol stadionida olib borilayotgan bunyodkorlik ishlari bilan tanishdi.
Surxondaryo viloyati sportning o‘yin turlari va yengil atletika bo‘yicha ixtisoslashtirilgan sport maktabi tasarrufidagi stadionda ayni paytda yugurish yo‘lakchasi barpo etilmoqda. Tashrif davomida O‘zbekiston Respublikasi Prezidenti sovrini uchun kurash bo‘yicha xalqaro turnir loyihasi ham taqdim etildi.
Viloyat sport boshqarmasi boshlig‘i Ravshanbek Maxmudov amalga oshirilayotgan ishlar haqida axborot berdi.
Viloyat hokimi bunyodkorlik ishlarini sifatli va o‘z muddatida yakunlash, stadionni zamonaviy talablarga moslashtirish hamda xalqaro turnirni yuqori saviyada tashkil etish yuzasidan mas’ullarga tegishli topshiriqlar berdi.
