Har bir bola sifatli ta’lim-tarbiya olish va o‘z qobiliyatini namoyon etish imkoniyatiga ega bo‘lishi muhim. Shu jihatdan inklyuziv ta’lim alohida ta’lim ehtiyojlari bo‘lgan bolalarni qo‘llab-quvvatlashda muhim o‘rin tutadi. Termiz shahridagi 9-sonli davlat maktabgacha ta’lim tashkilotida inklyuziv guruh faoliyati samarali yo‘lga qo‘yilgan. Ayni paytda guruhda 9 nafar tarbiyalanuvchi ta’lim-tarbiya olayotgan bo‘lib, ularning rivojlanishi defektolog va logoped mutaxassislar tomonidan qo‘llab-quvvatlanmoqda.
Maxsus korreksion xonada bolalarning nutqini rivojlantirish, muloqot ko‘nikmalarini shakllantirish va ijtimoiy moslashuviga ko‘maklashishga qaratilgan mashg‘ulotlar muntazam tashkil etilmoqda.
E’tiborlisi, joriy yilda 5 nafar tarbiyalanuvchi tayyorlov guruhini tamomlab, umumiy o‘rta ta’lim maktablarining inklyuziv sinflarida o‘qishni davom ettiradi. Bu kabi amaliy yondashuv bolalarning ta’lim olish imkoniyatlarini kengaytirib, ularni keyingi bosqichga munosib tayyorlashga xizmat qilmoqda.
