Harbiy xizmatchilarning intellektual salohiyatini oshirish, tezkor va mantiqiy fikrlash qobiliyatini rivojlantirish, jamoaviy hamkorlikni mustahkamlash maqsadida harbiy qismda “Zakovat” intellektual o‘yini tashkil etildi.
Qizg‘in va murosasiz kechgan bellashuvda “Qalqon” va “Sarhad” jamoalari mantiqiy fikrlash, bilimdonlik va topqirliklarini namoyon etdilar. Ishtirokchilarga harbiy soha bilan bir qatorda tarix, adabiyot va umumiy dunyoqarashga oid murakkab savollar taqdim etilib, ulardan tezkor va aniq qaror qabul qilish talab etildi.
Ochiq osmon ostida o‘tkazilgan bahs davomida jamoalar har bir savol ustida hamjihatlikda fikr yuritib, o‘zaro jipslik va bilim salohiyatini namoyish etdilar.
“Zakovat” o‘yini harbiy xizmatchilarning nafaqat bilim va dunyoqarashini kengaytirish, balki tezkor fikrlash, vaziyatni tahlil qilish va jamoa bilan birgalikda qaror qabul qilish ko‘nikmalarini mustahkamlashda ham muhim ahamiyat kasb etdi.
Bellashuv yakunida hakamlar hay’ati tomonidan jamoalarning to‘plagan ballari hisoblab chiqilib, faol ishtirokchilar va g‘olib jamoalar munosib taqdirlandi. Bunday intellektual va ma’naviy-ma’rifiy tadbirlar harbiy jamoalarda sog‘lom raqobat, o‘zaro hamjihatlik va yuqori ruhiy muhitni shakllantirishga xizmat qiladi.
