Tabiiy gaz bugungi kunda dunyoda eng muhim energiya manbalaridan biri bo‘lib, u yuqori energiya samaradorligi, nisbatan past emissiyasi va keng qo‘llanilish imkoniyatlari bilan ajralib turadi. Elektr energiyasi ishlab chiqarish, sanoat tarmoqlari, uy-joylarni isitish va boshqa sohalarda tabiiy gazning o‘rni tobora ortib bormoqda.
Global energiya talabi oshib borayotgani va ekologik muammolar kuchaygani sababli tabiiy gazdan oqilona foydalanish, energiya samaradorligini oshirish hamda yo‘qotishlarni kamaytirish dolzarb vazifaga aylanmoqda. Bu nafaqat iqtisodiy tejamkorlikni ta’minlaydi, balki atrof-muhitga salbiy ta’sirni ham kamaytiradi.
Shu maqsadda Surxondaryo viloyatida 2026-yilda 28,8 million kub metr tabiiy gazni iqtisod qilish bo‘yicha maqsadli ko‘rsatkichlar belgilandi.
Jumladan:
— 9 520 ta energiya tejamkor uskuna o‘rnatilishi belgilangan bo‘lib, ishlar izchil davom etmoqda;
— 112 ta gaz taqsimlash punkti (GTP) modernizatsiya qilindi;
— 16,8 kilometr uzunlikdagi gaz tarmoqlarida mukammal ta’mirlash ishlari bajarildi;
— 3 639 ta iste’molchi xonadonida energiya tejamkor uskunalar o‘rnatildi;
— 716 ta qo‘shimcha tashkiliy-texnik chora-tadbirlar amalga oshirildi.
Aholi o‘rtasida energiya resurslarini tejash madaniyatini oshirish maqsadida viloyat bo‘ylab 105 martadan ortiq targ‘ibot va tushuntirish tadbirlari o‘tkazildi. Ushbu tadbirlar orqali tabiiy gazdan oqilona foydalanish, tejamkor qurilmalarni joriy etish va yo‘qotishlarni kamaytirish bo‘yicha keng tushunchalar berildi.
Surxondaryoda tabiiy gazni tejash va energiya samaradorligini oshirishga qaratilgan chora-tadbirlar tizimli ravishda amalga oshirilmoqda.
Bu borada nafaqat tizim tashkilotlari mas’ullari, balki har bir fuqaro masalaga jiddiy yondashib,o‘z xonadonlarida tabiiy resurslarimizdan samarali foydalanishni yo‘lga qo‘ysalar, uning ham iqtisodiy, ham ma’naviy ahamiyati yuqori bo‘ladi.
A.Ibrogimov,
Bosh prokuratura boshqarma prokurori,
adliya kichik maslahatchisi
