Yoshlar uchun katta avlod vakillarining hayot yo‘li, boy tajribasi katta hayot maktabi bo‘lib xizmat qiladi. Xatolarni takrorlamaslikka, shukronalik tuyg‘usi bilan yashashga, kechagi kunidan ibrat olib, bugunidan foydalanishga, ertangi kunga ishonch bilan boqishga o‘rgatadi. Ayni shunday qadriyatlarni o‘zida mujassam etgan uch avlod uchrashuvi Qiziriq tumanidagi “Zartepa” mahallasida ham bo‘lib o‘tdi.
Uchrashuvda pir-u badavlat nuroniylar, o‘rta va yosh avlod vakillari ishtirok etdi. Bir piyola choy ustida bo‘lib o‘tgan samimiy suhbat barchaning ko‘nglida o‘ziga xos taassurot qoldirganiga shubha yo‘q. Ayniqsa, mehnat faxriylarining fidokorona hayot yo‘llari haqidagi hikoyalari, qiziqarli voqealarni barcha maroq bilan tingladi.
O‘zbekning to‘y-u shodiyonasida doimo kurashlar, ko‘pkarilar tashkil etilgan. Asosiysi xalq estetik zavq olib, ma’nan xordiq chiqarishlari maqsad qilingan. Ayni an’analarni davom ettirgan uchrashuvda sportning kurash musobaqasi tashkil etildi. Polvon bolalarning maydonga tushib kurash tushishlari, shahd bilan kurashishgani tomoshabinlarning hayqirig‘iga, olqishlariga sazovor bo‘ldi.
Hilol
