Haydovchilik guvohnomasini yo‘qotgan fuqaro borki, qayta imtihon topshirib, mazkur guvohnomani qayta tiklatishi mumkin edi. Endi esa bu tizim butunlay bekor qilinadi. Hukumatning “Avtomototransport vositalari haydovchilarini tayyorlash, qayta tayyorlash va malakasini oshirish hamda ularni imtihondan o‘tkazish tizimini tubdan takomillashtirish chora-tadbirlari to‘g‘risida”gi qarori qabul qilindi.
Qolaversa, “Yo‘qotilgan milliy haydovchilik guvohnomasi (eski namunadagi haydovchilik guvohnomasi va uning taloni)ning dublikati transport vositasini boshqarish huquqidan mahrum etilgan haydovchilik guvohnomalari ma’lumotlar bazasida tekshirilgandan so‘ng imtihonlarsiz beriladi”, deyiladi hujjat matnida.
Ma’lumot o‘rnida aytish mumkinki, 2022-yil 1-noyabrdan haydovchilik uchun beriladigan tibbiy ma’lumotlarning yagona elektron bazasi shakllantiriladi va Yagona axborot tizimiga integratsiya qilinadi. 2023-yil 1-yanvargacha esa Yo‘l harakati xavfsizligi xizmatining avtomatlashtirilgan Yagona axborot tizimi ishga tushiriladi.
S.Murodova
