Termiz shahrining “Ma’rifat” mahallasida zamonaviy sharoitlarga ega, ilg‘or tajribalar asosida tashkil etilgan “HARVARD” xususiy maktabi o‘z faoliyatini boshladi.
Ochilish marosimida Surxondaryo viloyati Maktabgacha va maktab ta’limi boshqarmasi boshlig‘i Xusniddin Mamadiyev so‘zga chiqib, mustaqil O‘zbekiston ta’lim tizimida xususiy maktablarning o‘rni tobora ortib borayotganini ta’kidladi. Unga ko‘ra, bunday muassasalar davlat maktablariga munosib hamkor bo‘lib, sog‘lom raqobat muhitini shakllantirmoqda.
310 o‘quvchiga mo‘ljallangan mazkur ta’lim maskanida darslar o‘zbek va rus tillarida olib boriladi, o‘quvchilar uchun zarur barcha sharoitlar yaratilgan. Shu tariqa, Surxondaryoda faoliyat yuritayotgan xususiy maktablar soni 10 taga yetdi. Bu esa viloyatda ta’lim imkoniyatlari kengayib, ota-onalar va o‘quvchilar uchun yanada ko‘proq tanlov yaratilayotganidan dalolat beradi.
