Biotexnik tadbirlar barqarorlikni saqlaydi

Ob-havo injiqliklarini ko‘rsatib, bahor kunlarida borliqni oppoq qor qopladi. Izg‘irin sovuqda issiqqina uylarimiz jonimizga ora kirgani rost. Ammo biz issiqdan rohatlanayotgan bir paytda ochiqlikdagi tiriklikning ahvoli ne kechdi ekan.
Ana shunday sharoitda “Surxon” davlat qo‘riqxonasi, “Yuqori To‘palang” milliy tabiat bog‘i va “Bobotog‘” milliy tabiat bog‘i hududida qishki sharoitda yovvoyi hayvonlarni himoya qilish va ularning nobud bo‘lishining oldini olish maqsadida biotexnik tadbirlar amalga oshirilayotgani esa ayni o‘y qiynayotgan insonlarning ko‘ngliga taskin bo‘lishi aniq.
Tadbirlar doirasida ushbu hududlarda hayvonlar ko‘p uchraydigan joylarga xashak, yem va oziq moddalar qo‘yib chiqildi. Bu chora-tadbirlar hayvonlarning oziq tanqisligi sababli zaiflashishining oldini olish, ularning tabiiy yashash muhitini qo‘llab-quvvatlash hamda ekotizim barqarorligini saqlab qolish maqsadida olib borilmoqda.
Muhofaza etiladigan tabiiy hududlarda qish mavsumida hayvonlar uchun oziq topish qiyinlashgani sababli, bunday tadbirlar ularning soni va tur tarkibini saqlab qolishda muhim ahamiyat kasb etadi. Shu bois, mutaxassislar tomonidan ushbu hududlarda monitoring olib borilib, ehtiyojga qarab qo‘shimcha choralar ko‘riladi.
Mazkur biotexnik tadbirlar tabiiy ekotizimni muhofaza qilish va yovvoyi hayvonlarning hayotiy sharoitlarini yaxshilashga qaratilgan bo‘lib, ularning barqaror populyatsiyasini ta’minlashda muhim rol o‘ynaydi.