Maksimal balni jamg‘ardi

14 yoshida o‘z oldiga ulkan maqsadlarni qo‘ygan Termiz tumanidagi 16-AFCHO‘Mning 11-sinf o‘quvchisi Javohir Rustamov yuksak cho‘qqini zabt etdi. U fanlarni mukammal o‘zlashtirib, kimyo, biologiya, tarix, matematika, ona tili va adabiyoti fanlaridan milliy sertifikatlarni qo‘lga kiritdi va maksimal 189 balni jamg‘ardi.
Oiladagi ibratli tarbiya, ustozlarining ko‘magi va albatta, tinimsiz harakat Javohirning yutuqlari kalitidir. Uyqusiz tunlar, bilim olishga bo‘lgan katta ishtiyoq qahramonimizning shifokor bo‘lishga kuchli istagidan ekan. Endilikda tibbiyot yo‘nalishida istalgan oliygoh talabasi bo‘lish imkoniyatiga ega bo‘lgan Javohir Rustamov Toshkent tibbiyot akademiyasida tahsil olmoqchi. O‘rta ma’lumotli ota-ona orzusi ham Javohir orqali o‘z ro‘yobini topdi desak yanglishmaymiz.