Monitoring qilinadi…

Hukumat qarori bilan “Davlat organlari va tashkilotlarining ochiqlikni ta’minlash sohasidagi normativ-huquqiy hujjatlarda belgilangan majburiyatlarga rioya etilishini masofadan monitoring qilish tartibi to‘g‘risida”gi nizom tasdiqlandi. Nizom masofadan monitoring qilish asoslari, tartibi va muddatlari, natijalarini rasmiylashtirish va ko‘rib chiqish hamda masofadan monitoring qilish yakuni bo‘yicha aniqlangan holatlar yuzasidan ta’sir choralarini qo‘llashni nazarda tutadi.
Davlat organlari va tashkilotlarining ochiqlikni ta’minlash sohasidagi normativ-huquqiy hujjatlarda belgilangan majburiyatlarga rioya etilishi Korrupsiyaga qarshi kurashish agentligi tomonidan masofadan monitoring qilinadi. Masofadan monitoring qilish rejali va rejadan tashqari asoslarda o‘tkaziladi.
Agentlik davlat organlari va tashkilotlarini masofadan monitoring qilish boshlanganligi yoki o‘tkazilayotganligi haqida oldindan ogohlantirmaydi (xabardor qilmaydi). Masofadan monitoring qilish yakuni (natijasi) bo‘yicha qonunchilik hujjatlarining buzilishi aniqlangan holatlar yuzasidan ma’lumotnoma rasmiylashtiriladi. Ma’lumotnomada qayd etilgan qonunchilik hujjatlarining buzilishi Agentlikning huquqiy ta’sir hujjati shaklida monitoring qilingan davlat organi va tashkilotiga yuboriladi.
Huquqiy ta’sir hujjati davlat organi va tashkilotiga kelib tushgan sanadan e’tiboran 10 kun muddatda ko‘rib chiqilishi va natijasi bo‘yicha Agentlikka yozma axborot berilishi shart.