Munosib taqdirlandi

Volontyorlar harakati bugun ko‘plab insonlarga mehr va g‘amxo‘rlik ko‘rsatib, ko‘ngillarni shod etib kelayotir. Ehhe, bugun yosh volontyorlarimizning faoliyatini sarhisob qilsak, ko‘plab ibratli va savobli ishlarning guvohi bo‘lamiz. Muhimi, kimnidir moddiy tomondan ta’minlash emas, qandaydir ta’ma, foyda ko‘rish ham emas. Shunchaki, ko‘ngil amri, savob ilinji ila qalblarga nur ulashishdir. Bu ibrat, eng yaxshi insoniylik namunasi hamdir.
Mana shunday yaxshilik qilishga ko‘ngilli bo‘lganlar vohamizda ham bor. Siz-u biz ularni yaxshi taniymiz, ularning faoliyatiga xayrixoh ham bo‘lganmiz. Yangi yil ostonasida, o‘tib borayotgan yil yakunlarida amalga oshirilgan ishlar sarhisob qilinayotgan pallada Toshkent shaharidagi Yoshlar ijod saroyida “TOSHKENT – MDH YOSHLAR POYTAXTI – 2024” xalqaro loyihasining yopilish marosimi doirasida “Muzrabot volontyorlari” EVH rahbari Fazliddin Abdirahmonov O‘zbekiston miqyosida joriy yil davomida o‘zini tashabbuskor, ma’suliyatli, insonparvar va fidoyiligini ko‘rsatganligi hamda O‘zbekistonda ezgu ishlar qiluvchilar safini kengaytirishdagi hissa uchun “Yil volontyori — 2024” sifatida taqdirlandi. Bunday e’tibor Fazliddin kabi unga yelkadosh bo‘lib, bahamjihatlikda faollik ko‘rsatgan barcha yoshlarni birdek quvontirdi, ruhlantirdi. Kelgusidagi volontyorlik harakatlariga yanada kuch va shijoat bag‘ishladi.