Mehnatdan kelsa boylik…

Ayol haqida gap ketganda, uning matonatiga tahsin o‘qimaslik mumkin emas. Ayol ish, ro‘zg‘or tashvishlari-yu, farzand tarbiyasini-da bir maromda olib borishi bilan kishini hayratda qoldiradi. Atrofdagilarning hurmat-e’tibori-yu hayratiga sazovor bo‘lib kelayotgan ayollardan biri sho‘rchilik Muqaddas Nurmatovadir. U tomorqasining 15 sotix maydoniga qulupnayning “Viktoriya” navini ekib parvarishlamoqda.
Albatta, qulupnay ekilgach, o‘zi unib chiqadi, mehnati kam deydiganlar adashadi. Ushbu meva ham qarovni sevadi, qulupnaylar yirik-yirik bo‘lib tugishi, tanasiga rang kirgunga qadar anchayin mehnat qilish, ter to‘kish joiz. Buni Muqaddas opachalik biladigan bo‘lmasa kerak.
— Turmush o‘rtog‘im bilan maslahatlashib, tashkil qilgan issiqxonamizga 12 ming dona qulupnay ko‘chatlarini o‘tkazdik, — deydi M.Nurmatova. – Oktyabr oyida ekilgan ko‘chatlarimizning hosilini yanvar oyida yig‘ishtirib olamiz.
Yaxshi niyat bilan harakatdan to‘xtamayotgan bu oila shubhasizki, mehnatlarining mevasini yig‘ishtirib olib, mo‘may daromad olishadi.