Savob ishni har kim, har kuni qilmog‘i lozim. Ayniqsa, birgina yordam bilan kimdir hayotga qaytsa, yangitdan tug‘ilgandek bo‘lsa… bu hojatbarorga ham bir olam quvonch, o‘ziga ishonch hissini uyg‘onadi. Buni his etish uchun kimgadir yaxshilik qilish, savob ishlarga bosh qo‘shish kifoya.
Oltinsoy tuman Tibbiyot birlashmasining shoshilinch tez tibbiy yordam bo‘limi yangi binosida respublika miqyosida boshlangan “Qon topshir – hayot in’om et!” aksiyasi tadbiri doirasida ana shunday ko‘ngillilar qon topshirdi. Ular orasida hokimlik xodimlari, shifokorlardan tortib, oddiy odamlar ham bor.
— Qon topshirish har ikki tomon uchun ham foydali, — deydi Oltinsoy tuman Tibbiyot birlashmasi boshlig‘i Farid Umarov. — Organizmda yangi qon tanachalari ishlashni boshlaydi, yasharadi. Aksiyada ko‘ngillilarga qon topshirishning foydalari haqida ham mutaxassislarimiz tomonidan atroflicha tushuntirish ishlari ham olib borildi.
Hilol
