Sovg‘asi kitob bo‘ldi

Mutolaa sevimli mashg‘ulotiga aylangan yoshlar zehnli, fikrini ravon bildiradigan, mushohadali bo‘ladi. Ular qayga borishmasin, go‘zal xulq-atvori, ma’noli fikrlari bilan e’tiborni tortadi, e’tirof etiladi. Surxondaryo viloyat bolalar kutubxonasi xodimlari tomonidan yozgi ta’til davrida o‘quvchilarning bo‘sh vaqtlarini mazmunli o‘tkazish maqsadida Termiz shahridagi “Bolajon” istirohat bog‘ida tashkil etilgan “Kitob oqshomi” nomli musiqali kechada qatnashgan kitobxon yoshlar xuddi shunday e’tirof etildi.
Musiqali kecha tadbiriga “Bolajon” bog‘iga tasrif buyurgan yosh borki, jalb etildi. Har bir ishtirokchining nechog‘lik kitobxon ekani, bilimlarini sinovdan o‘tkazish maqsadida savollar berilib, javoblari tinglandi. Bilimli, hozirjavob yoshlar esa shu joyning o‘zida sovg‘a sifatida o‘zbek va jahon adabiyotining eng sara namunalari bilan taqdirlandilar.