Bitiruvchi yoshlarni band qilish maqsadida

O‘qishni tamomlagan borki, qayerda ishlasam ekan degan o‘y bilan munosib ish o‘rnini izlashga tushgan. To‘g‘ri-da, har bir inson jamiyat uchun, davlat uchun naf keltirishni istaydi. Ana shunday izlovlarga labbay degandek, Bandixon tumani hokimligi, kambag‘allikni qisqartirish va bandlik bo‘limi, tuman maktabgacha va maktab ta’limi bo‘limi, tuman Yoshlar ishlari bo‘limi hamkorligida bitiruvchi yoshlarning bandligini ta’minlash maqsadida bo‘sh ish o‘rinlari mehnat yarmarkasi tashkil etildi.
Ushbu mehnat yarmarkasi yoshlar uchun har tomonlama foydali bo‘ldi. Tashkilot va korxonalar taklif etayotgan ish o‘rinlari haqida qiziqib, ma’qul kelganlari bilan shartnomalar qilishga kirishdilar. Yarmarkada 46 dan ortiq korxona va tashkilotlar 239 ta bo‘sh ish o‘rinlari bilan qatnashdi. Shu kuni 51 nafardan ortiq fuqaro yarmarkada ishtirok etdi va 10 nafari doimiy va mavsumiy haq to‘lanadigan jamoat ishlariga joylashtirilib yo‘llanma berildi. 41 nafar fuqaroga esa mehnat qonunchiligi bo‘yicha tushunchalar berildi.