Surxondaryo viloyatida qishloq xo‘jaligi mavsumiy ishlari jadallashib, agrotexnik tadbirlarning ijrosi tanqidiy-tahliliy ruhda ko‘rib chiqildi. Viloyat hokimi Ulug‘bek Qosimov Muzrabot tumanida bo‘lib, oziq-ovqat xavfsizligini ta’minlashga qaratilgan ustuvor vazifalar ijrosini joyida o‘rgandi.
Videokonferensaloqa orqali tumanlardagi holat muhokama qilinib, g‘alla maydonlarini o‘z vaqtida parvarishlash, o‘g‘itlash va sug‘orish samaradorligi, chigit va kartoshka ekish, shuningdek dala chetlariga mevali ko‘chatlar ekish ishlari yuzasidan ma’lumotlar tinglandi.
Shu bilan birga, irrigatsiya infratuzilmasini yaxshilash, yer tekislash, sanoatlashgan bog‘ va tokzorlar barpo etish hamda mavjud yer resurslaridan oqilona foydalanish masalalariga alohida e’tibor qaratildi. Aniqlangan kamchiliklar bo‘yicha mas’ullarga aniq vazifalar yuklatilib, har bir gektardan yuqori hosil olish asosiy maqsad etib belgilandi.
